خدعوك فقالوا اوعى كلام الناس لو حد قالك الناس قوله معرفش حد بالاسم دا

كتبت: ريهام طارق

احب اقولك يا صديقي انك ضيعت عمرك كله في إرضاء الناس….

إزاي الناس متتكلمش عنك

إزاي الناس متاخدش فكره وحشه عنك

إزاي تبقي سمعتك حلوه قدام الناس

إزاي الناس متزعلش منك

إزاي الناس تفضل فاكراك

إزاي الناس تصفق لك

إزاي بتلبس براند وتركب عربية آخر موديل وتمسك موبايل بالالافات عشان منظرك قدام الناس

دا حتي افراحنا وعزانا بنعمله في افخم الاماكن خوفاً من كلام الناس

نكتب قائمة ومؤخر غالي ونجيب شبكة الماظ علشان كلام الناس

كلنا ضيعنا عمرنا كله في البحث عن إرضاء الناس

ونسينا خالص ان الناس عمرها ما هترضى عنك وهتفضل شايفه الجزء الناقص اللي فيك

لا دا كمان عمرها ما بتفتكرك غير وأنت قصادها

حتى لو مت حزنها بس بيكون وقت قراءة الخبر وعلي دخول الليل بتكون ذكرى

كبيرهم يقولوا الله يرحمه ويكملوا تفاصيل حياتهم عادي جدا

و من أخطر انواع غباء الإنسان أنه حاطط الناس دايما تارجت له لكل حاجه بيعملها الناس بقت مقياس النجاح والفشل له

طيب ايه رايكم نقلب الترابيزة ونلعب لعبه جديده و نجربها يمكن ساعتها نكسب ومتخسرش

جرب تركن الناس على جنب بعيد واعمل كل حاجه تريحك أنت تفرحك انت تسعدك أنت كل حاجه مناسبه ليك انت،

الاهم من دا رضا ربنا أعمل خير عشان خاطر ربنا

اي حاجه هتعملها أعملها لوجه الله اتعلم تتكلم مع ربنا وفضفض له كتير اوي علي الأقل مش هيعرف نقطة ضعف فيك ويستغلها أو يعايرك بعيوبك أو يضايق منك ويقولك أنت بترمي طاقه سلبيه عليا

حياتك بتاعتك لوحدك وهبها لك الخالق وميزك عن باقي المخلوقات بالعقل عشان تفكر وتقدر تاخد قرارات صح وأول قرار هتاخده إني مش هشيل هم الناس تاني

هضور علي راحتي وسعادتي…

ماليش غير رضا ربنا…

هسعي على الخير في الدنيا لوجه الله…

سد ودانك وغمض عيونك عن رأي الناس ولا تجادل وهخلي مرجع حياتك القرآن، ودليل راحه قلبي الصلاه، واستقرار نفسي في ذكر الله.

أما لو حد قالك الناس قوله معرفش حد بالاسم دا.