حوار ريهام طارق
الموهبه الفنيه الكبيره الطفلة خديجة احمد فؤاد العسقلانى المعروفة باسم خديجه احمد من مواليد القاهرة السادس عشر من شهر أكتوبر عام ٢٠١٤، دخلت المجال الفني من خلال مجال الإعلانات ومنها كانت انطلاقة خديجة الحقيقية وبداية دخولها إلى عالم الفن بعد ما لفتت أنظار المخرجين بحضورها الطاغي وملامحها البريئه المعبرة، أيضا ذكائها الفني الذي ظهر بوضوح من أول عمل شاركت به، ومن الأعمال الفنية التي شاركت بها هي
مسلسل “حب عمرى”، حكاية “لازم اعيش” و حكاية “يبقى الاثر” ضمن حكايات مسلسل “الا انا” ، كله بالحب، الحرير المخملى، مجنونة بيك ومؤخرا مسلسل “طير بينا ياقلبى”
وكان لي هذا الحوار الممتع معها في عيد ميلادها.
_ ما هو سر حبك للتمثيل؟
انا بحب التمثيل من غير سبب انا بحب أمثل و ببقى مبسوطة و انا بصور وخصوصا لو عندى عرض مسرح
كيف تذاكرين الشخصية وتحضري لها؟
بذاكر الشخصية لما الورق يجيلى و ماما تقعد تقرأ معايا و بدخل اصور الاداء بيطلع لوحدة و فى مخرجين بيبقوا عايزين اعمل الشخصية بطريقة معينة بحاول اعملها زى ما بيقولوا وأنفذ توجيهات المخرج.
_ ما هو أول عمل كان سبب معرفة الجمهور بيكي؟
اول عمل الناس عرفتني من خلاله كان اعلان “بندولين” مع الفنانة مى كساب و كنت عاملة وقتها دراما بس الناس عرفتني من الاعلان.
– ما هي أكثر الأعمال الأقرب إلى قلبك ؟
حبيت مسلسل “الا انا” الجزئين و خاصة الجزء الاول حكايه البهاق كان صعبان عليا نفسى وحسيت اد ايه الناس دي بتتعذب وبتتعب نفسيا.
_ مين أكثر النجوم إللي حبيتي الشغل معاهم؟
حبيت انكل مصطفى فهمى جدا فى مسلسل “الحرير المخملى” و حبيت كمان انكل نور محمود فى مسلسل “طير بينا يا قلبى”
_ من الفنانة التي تعتبرها قدوتك؟
قدوتى فى التمثيل سعاد حسنى و فاتن حمامة و في الحياة الخاصة بابى عشان بيتعب معايا و بيشجعني دايما.
_ ما هي أكثر الأشياء التي تسبب لك ازعاج في اللوكيشن ؟
اكتر حاجة بتضايقنى فى اللوكيشن لما بيكون التصوير لساعات طويلة كل فريق العمل بيتعب جدا بس بنكون مبسوطين بالتعب دا تقدري تقولي الذ تعب.
_ من هم أقرب أصدقائك داخل الوسط الفني؟
كل الناس الى اشتغلت معاهم بحبهم و اصحابي.
_ ما هو حلمك في المستقبل تصبحين فنانة مشهورة أم ناجحة في عمل آخر ؟
لما اكبر أتمنى ادرس حاجة اكون ناجحة فيها ويكون
عندى كارير مستقل ولكن في وجود التمثيل.
_ من هو النجم الذي تحبيه وتتابعي كل اعماله من الموجودين على الساحه حاليا؟
بحب جدآ احمد مكى و كريم عبد العزيز و دنيا سمير غانم و نيللى كريم.
_ ما هي أهم ردود الأفعال التي قابلتك بعد عرض مسلسل طير بينا يا قلبي؟
من أهم ردود الأفعال أن كل أصحابي في المدرسة بقوا عرفنى و المدرسين كمان و كلهم بيقولولى دورك حلو اوى و معجبين بالعلاقة بينى و بين بابا انكل نور محمود فى المسلسل.
_ ماذا عن تعاونك مع الفنان نور محمود؟
بحبه جدا لانه طيب أوي وحسيت أنه بابا بجد.
أيهما الأقرب إلى قلبك المسرح أم التلفزيون؟
بحب المسرح أكثر وبحلم اشتغل مسرح كتير جدا
_ من هو أكثر شخص له الفضل في نجاحك في المسرح؟ استاذ مصطفى عبد السلام هو اللى علمنى إزاى أحب واقف على المسرح
– ما هو آخر عرض مسرحي شاركت به؟
– عرض “الخيار” إنتاج نقابة المهن التمثيلية ومن إخراج مصطفى عبد السلام.
في عيد ميلادك ما هي الأمنية التي تتمنى أن تحقق في عامك القادم؟
أتمنى ان كل الاعمال الى بعملها يكون لها صدى كبير وناجح عند المشاهدين وأكون متميزه في كل دور أقدمه، واجسد أدوار وشخصيات كتير و مختلفة مع كل النجوم اللي بحبهم و نفسى اشتغل معاهم و بحلم أقدم أعمال تانيه كتير لأني بحب المسرح جدآ و نفسى كمان انجح فى دراستى.
في النهاية سعدت بالحوار معك وأتمنى لكي مستقبل باهر وكل عام وأنتي بخير بمناسبه عيد ميلادك
